Firefox Rocket (Lite) Basa Acèh

Firefox Rocket (Lite) Basa Acèh

Lam basa Aceh na narit nyang ka geungui seugohlom na iseutilah teknologi uroe nyoe, miseu lagè narit “cok keubah” nyang makna jih saban lagèe narit “download“. Narit nyan geungui nibak geuyue cok ngön geuyue keubah sipue pue, teuma miseu meugabông dua boh narit nyan sang hi gasa bacut bak ta kheun. Rab hi ureueng beungèh, bah pih hana meukesud meunan. Meunan keuh narit “cok keubah” jeut tangui lam meubagoe app mobile geulantoe download.

Lam Firefox Rocket seubagoe saboh aplikasi nyang jeut ta tamah lam basa Aceh na keuh saboh aplikasi nyang hayeue that, rab mandum basa na hinan, basa Jawa ngön Sunda pih ka awai lom kana hinan. Bah pih basa nyan deuh lam neuatô jih sagai, ka meuhi mangat até teuh bacut wab ka rab na syit nyang lam basa Aceh. Jipeugah lé awak nyoe lam kawan komunitas nyan meunyo hana halangan akhé thon nyoe atawa thon ukeu ka na lam basa Aceh syit.

Firefox Rocket Basa Aceh kriban??

Na rakan tanyoe nyang ka geu ci ngui Firefox Rocket lam basa Aceh versi Beta, lheuh nyan na geu ci peugah kiban nyum jih lagèe lam video iyub nyoe.

Teungku Nyak Man teungöh geuci ngui browser Firefox Rocket lam basa Aceh

I miyub nyoe jeut neu cok keubah (download) ju atawa neu bulueng (share) keu rakan rakan laen bah jeut geuci ngui dilèe nyang versi Beta jih, wab kadang na nyang mantöng kureung kureung paih lom neu tulong bri thèe deungön cara neutuléh bacut i miyum nyoe eunteuk ba akhé.

Meunan hi Firefox Rocket lam Basa Aceh

Firefox Rocket Versi Beta Android (Golom Raseumi na bak Playstore) Cok Keubah hinoe. 

Kriban Cara Peugöt Firefox Rocket lam Basa Aceh?

Meunyo neutanyöng bak lon nyan ka hana lon tu’oh peugah syit, teuma nteuk ta ci tanyöng bak rakan geutanyoe lam kawan nyan nyang roh peugöt Firefox Rocket lam basa Aceh. Tuema nyang lon teupue na keuh ta peugöt nyan bak pontoon.mozilla.org. Pontoon nyan seubagoe saboh laman web nyang jeut ta teujeumah aplikasi – aplikasi mozilla u dumpue basa hinan. Aplikasi Mozilla nyan jai that dum miseu lagèe Firefox Focus, Firefox Rocket, Firefox for Android, Firefox for iOS atawa proyek – proyek laen dum nyang na hinan.

Teujeumah Mozilla lam dumpue basa bak Pontoon, meutuléh ngön basa Inggreh

‘Oh lheuh nyan jeut syit ta kalön nyang basa Aceh ka lheuh geuteujeumah  lé rakan rakan geutanyoe. 

Firefox Rocket lam basa Aceh ka 100% geuteujeumah.

Nan Firefox Rocket Meugantoe Lom

Lagèe nyang ka jipeugah lèe awak firefox lam saboh komunitas online, jipeugah nan firefox rocket nyan jikeuneuk tuka keu Firefox Lite. Teuma asoe i dalam jih nyan saban syit nan sagai jigantoe mangat ramé lom ureung ngui man saboh donya aplikasi Firefox Lite nyan. Kadang pih kali ukeu ntruek miseu ‘oh ta mita bak Play Store Android ka hana lé nyan jeut ta mita ju deungön nan Firefox Lite .

Firefox nyang laen

Seulaen Firefox Rocket atawa Firefox Lite, na syit meupadum proyek teujeumah lam basa Aceh laen nyang mantöng hana seuleusoe lom, yakni Firefox (nyang tangui nibak komputer) dan Firefox Focus (nyang hana awak meukat i dalam jih).

Firefox ka 22%
Firefox nyang paleng utama lam proyek pontoon

Nyoe keuh proyek nyang paleng utama lam aplikasi Firefox, deungon string nyang paleng jai sampoe troh 11.012 string. Miseu ta neuk ci ngui nyan jeut ta peuhah ju röt aplikasi Firefox Nightly nyang ji peuteubiet tiep uroe, si uroe sigö nibak poh 12 malam. Teuma basa Aceh hana lom beh meuteujeumah syit lom, bah pih rakan rakan gutanyoe lam kawan nyan ka na meu 15 droe sampoe uroe nyoe. Kadang droen jeut neubantu teujeumah syit bah bagah lheuh lam basa Aceh.

Firefox Focus for Android ka 30%

Laen nibak Firefox Rocket ( Lite) ngön Firefox nyang diateuh satnyoe na syit saboh teuk nyang ji boh nan Firefox Focus for Android. Nyan pih meubaro 30% lheuh geuteujeumah lé rakan – rakan geutanyoe lam kawan nyan. Firefox focus nyan jeut keu saboh aplikasi browser nyang aman beu bek jeut ji seutöt geutanyoe nyang peuhah browser nyan dan beu bek na soe teupue pat ureung peuhah jih wab hana meukeubah log riwayat browsing ‘oh watèe ta tob. Tuema nyan keuh nyan, lam basa Aceh pih golom beh geu teujeumah lom lé rakan -rakan geutanyoe. Kadang pih droen jeut neubantu teujeumah lam basa Aceh syit bah leubeh bagah lheuh lom.

Meunan keuh keu bhah saboh aplikasi nyang ka rab na lam basa Aceh uroe nyoe. Ta meu do’a dan da ta useuha sama sama beu bagah lheuh meuteujeumah mandum nyan. Bah pih hana laba sapue keu ureung nyang teujeumah nyan lam beuntuk pèng, teumah nyan keuh laba laen keu basa Aceh ka meutamah ramé lom ureung ngui.

Gisa u ateuh