Aceh Ngön Teknologi

Aceh Ngön Teknologi

Pajan ureueng aceh phon geuturi teknologi? Nyan sang payah ta tanyöng bak daruet canggang ijo, lagèe aneuk miet tanyöng ho barat, daruet? I daruet canggang nyan laju ji peusingèt ulèe, u keu nyang galak jih. Nyan keuh nyan barat kheun ngön aneuk miet nyan.

Teuma jinoe ka mangat bacut, deungön teknologi lagèe uroe nyoe ka mangat ta teupue padum droe ka ureung Aceh ngui internet?

Meunurot data nibak Google Adwords di Aceh na rab trôk 900.000 droe ureung ngui internet nyang roh lam data awak nyan.

Miseu lam kuta Banda Aceh sagai syit lam 350.000 droe sagai, Lhokseumawe 120.000, Bireuen 90.000, Langsa 85.000, Tamiang 60.000, Sigli 48.000, Meulaboh 45.000, Takengon 43.000, ngön Sabang rab 25.000.

Meunan keuh nyang na data keu bhaih teknologi di Aceh uroe nyoe nibak thon 1440 nyoe. 

Teuma jameun kriban?

Nibak uroe jéh hana pat ta mita ata meunan meunan, boh pané na meu ureung pih tan. Kabéh geuplueng lam uteun atawa u luwa nanggroe dum watèe masa nyan. Teknologi na syit bah pih han that hayeu lagèe uroe nyoe, miseu na enjin/meusén ceumeul’hö nyang geungui i blang watèe lheueh geukeumeukôh. Meusén nyan na syit nyang kheun musén peurontok padé, teuma lam basa Aceh nyang beutoi nakeuh meusén ceumeul’hö. Lagèë nyang geupeugöt lé kilang CV Keluarga Group di Tingkeum Manyang, Kutablang atawa CV Nakri di Matang Geulumpang Dua, mandua nan nyan uroe jéh roh lam kabupaten Aceh Utara teuma dudoe ka geuplah jeut keu kabupaten Bireuen sampoe ‘an uroe nyoe. CV Keluarga Group nyan uroe jéh geupeuteubiet ngön geumeukat meusén ceumeul’hö nyan sampoe u Jawa meureutoh boh lam sigö ba. Nyan geuba ngön moto raya keudéh u Jawa nibak thon thon 1420, meupadum gö lam sithon.

Awai lom na syit watèe masa prang ngön Blanda, ureueng Aceh geupeugöt meuriam keudroe deungön beusoe atawa teumaga. Sampoe ‘an jinoe mantöng jeuet ta kalön meuriam nyan i musium Aceh atawa i musium nyang na di Blanda, leë that iba keudéh watèe jiwoe bak masa nyan.

Meuriam Aceh i Blanda bak musium.

Awai nibak nyan lom teknologi ureueng Aceh na keuh lagèe saboh kapai nyang jituléh lam kitab awak Portugéh (Portugis), lam kitab nyan meutuléh keujadian prang ureung Aceh ngön Portugéh di Meulaka (Malaka). Prang nyan tréb that han béh béh, sampoe meuninggai sidroe Syeikh nyang paléng hayeue di Aceh bak masa nyan. Nyan keuh Syeikh Syamsuddin As Sumatrani, sidroe ‘Ulama nyang paléng hayeue bak masa nyan, Qadhi Malikul ‘Adil nyang bit bit hayeu sampoe geu jak lam prang meusigö ngön Sultan Iskandar Muda ngön laskar prang keudéh u Meulaka ( Jinoe kajeut keu Malaysia) geuprang kaphé nyang ijak jajah Meulaka.

Miseu jinoe ta neuk mita pue teknologi laén nyang jeut ta kalön di keu mata sampoe uroe nyoe na syit nyang kayém geukheun batèe jrat. Batèe jrat nyan kön mangat bak geupeugöt, na nyang ubit na nyang raya. Nyang meutuléh kalimah

لااله الا الله

Na syit nyang meutuléh ayat Qur’an bak batèe nyan, na syit nyang meutuléh kisah udép atawa nasehat keu ureuëng nyang mantöng udép nyang baca teunuléh nyan. Meumacam macam teunuléh lam harah Arab atawa Jawöe jeuet ta kalön sampoe ‘an uroe nyoe. Miseu lagè jeuet ta kalön bak musium aceh, atawa lagèe jeuet ta kalön bak laman web MAPESA (Masyarakat Padoli Seujarah Aceh )

Jinoe ka Alhamdulillah ka mangat bacut, ka na keuh ureung beuj بچ (baca) basa Aceh lagèe droen nyang baca teunuléh nyoe.

Nyan keuh meunan kayém tadeungö ureung peugah peugah haba bak keudè kupi.

*Geutuléh lé Iqbal Hafidh, geujak beuet bak Bale Drah Aceh Jawoe جاوي اچيه i Darussalam. Nibak thon 1440 uroe hameh bak 9 uroe buleun, buleuen sapha.

Gisa u ateuh