Watèe beungöh lheuh seumayang suboh ka jeut keu ‘adat di Aceh ramè ureung tuha muda duek duek jeb kupi bak keudè kupi nyang toe ngön seumeujid. Lheuh nyan meubarô geuwoe u rumoh seugohlom geujak u blang atawa ho laén bak buet droe geuh. Hinan keuh ureueng Aceh duek duek peugah peugah haba, baca koran atawa nonton beurita bak tivi. ‘Oh watèe malam na syit nyang nonton bola bak keudè kupi. Miseu di rumoh geu nonton hana hayeue geupeugah hana ngön ta peugah haba.
Teuma lheuh nyan ka meutamah hayeue lom keudè kupi ka jeuet keu teumpat geuduek pakat ureung tuha tuha, na syit ka jeut keu kantô wab ka na meutamah internet lam keudè kupi. Watèe masa nyan internet mantöng meuhai bacut miseu tabloe meu buleuen i reumoh yumjih meuhai bacut, leubéh mangat jak mita ju bak keudè kupi sira jeb kupi-kupi ju hinan. Kadang peureulèë mie pih na syit, miseu ka deuk gohlom lheuh bu ngön mi pih ka meumada. Teuma awak meukat mi nyan kadang hana jimeukat yoh watèe beungöh, gohlom siap bahan awak meukat mi. Meunan keuh nyum mangat duek bak keudè kupi sira peuhah internet, bah pih bak rumoh rumoh di Aceh na syit nyang na na internet di rumoh.
Dudoe nibak nyan internet ka murah bacut, ka mangat tapeuhah ngön hapé ju meunan, adak pih ubit deuh bacut hana pue syit. Teuma nyang leupah gura aneuk cut cut pih ka jak duek bak keudè kupi jak mita internet, wab hana geubloe paket internet lé ureung chik. Lheuh geujok hape hana geuboh pulsa internet.
Nyan keuh nyan uroe nyoe ka thon 1440 bak buleun dua atawa buleun sapha, bah pih internet ka murah, bak keudè kupi mantöng ramè syit sabé sabé.
Meumacam ragam ureueng duek bak keudè kupi uroe nyoe. Na syit nyang mita internet beu bagah, wab ngön hape treb teuhah. Na syit nyang ka jeut keu kanto bak keudè kupi. Wab ta sewa keudè keu kanto pih meuhai, miseu bak keudè kupi ka mangat ju, peureulèë kupi pih ka na, hoi ju awak meukat. Leseutrek pih ka pré, peunajôh pih hana payah tanyöng lè, bu guri pih na syit. Na syit ladom keudè kupi jinoe na jiseudia lontong lontong lom.
Ngön pih hana mangat peugah haba miseu kön bak keudè kupi, sang hi meutamah ‘ileumee teuh miseu duek bak keudè kupi.
Meunan keuh keudè kupi bak tanyoe di Aceh uroe nyoe, kadang na rakan rakan nyang baca teunuléh nyoe teuma ka trép hana neuwoe u Aceh kriban pue na neu jeb kupi syit di nanggroe laén. Neutulông peugah hai bacut keu rakan rakan laen nyang kalön teunuléh nyoe bah meutamah meubahgia lom geutanyoë tarasa.
*Teunuléh lé Iqbal Hafidh di Darussalam, geujak beut bak Balè Drah Aceh Jawoë – جاوي اچيه
Thon 1440 bak uroe seulanyan, 6 uroe buleun lam buleuen Sapha.