Posted inBasa Aceh

Kitab Meurunoë Basa Acèh lé Wildan Abdullah ngön rakan – Ranup Sigapu

Kitab meurunoë basa Acèh na geutuléh lé Dr. Wildan Abdullah ngön padum droe rakan neuh. Na Abdullah Faridan, Mohd. Harun, Syafi’i, Faridah Hanum, Badruddin ngön T Husni. Lam saboh edisi nyang geupeuteubiet lé Peuneureubit Geuci keu aneuk miet glah VII SMP/MTS, lam mieng phôn lheuëh judui meutuléh hinan nyang jeuët seubagoe édito (ureueng peusaneut teunuléh) nakeuh Dr. Abdul Gani Asyik, M. A. Iluseutrato (ureueng gamba kulét) Wadi, nyang lèôt (peusaneut ruman mieng) Jamalus Sayuti. Lam peuintat keunarang atawa ranup sigapu meutuléh meunoe.

RANUP SIGAPU Sigala pujoe kamoe peutrôh keu Poteu Allah, Tuhan nyang po ban sigom dônya. Allah ka geubri nikmat sèhat ngön watèe keu kamoe lam meutuléh saboh buku basa Aceh keu aneuk sikula tingkat SMP/MTS. Seulaweuet seureuta saleum kamoe peutrôh keu pangulèe sigala Nabi, Muhammad Rasulullah. Gopnyan ka geubuka pintô até manusia hingga dônya nyoe lam aman sijahtra ngön beureukat ‘eleumèe Tuhan. Buku Peulajaran Basa Aceh keu murip glah VII SMP/MTs nyoe kamoe mulayi tuléh bak tanggai 6 Septèmbè 2006. Areutijih, buku nyoe ka leubeh sithôn lam prosèh teumuléh. Na bacut keundala lam teumuléh sabab maséng-maséng peunuléh tinggai meusipreuk rap ban saboh Aceh. (1) Wildan Abdullah, tinggai di Banda Aceh, dosen Jurusan Pendidikan Bahasa dan Sastra Indonesa dan Daerah, FKIP Unsyiah. Jinoe teungoh geupeuseuleusoe program doto bak Pusat pengkajian Bahasa, Kesusasteraan, dan Kebudayaan Melayu di Fakulti Sains Sosial dan Kemanusiaan, Universiti Kebangsaan Malaysia. Program Magister Pendidikan Bahasa geucok bak IKIP Bandungthôn 1992. (2) Abdullah Faridan, tinggai di Banda Aceh, dosen Jurusan Pendidikan Bahasa dan Sastra Indonesa dan Daerah, FKIP Unsyiah, tamat sarjana bak Fakultas Keguruan thôn 1978. (3) Mohd. Harun, tinggai di Banda Aceh, dosen Jurusan Pendidikan Bahasa dan Sastra Indonesa dan Daerah, FKIP ngön Program Pascasarjana Unsyiah, tamat Program Doktor Bahasa dan Sastra Indonesia di Universitas Negeri Malang thôn 2006. (4) Syafi, tinggai di Krueng Geukueh,Aceh Utara, guru/keupala sikula SMP A-Alaq,PT Asean Aceh Fertilizer, seuleusoe sarjana di IKIP Malang thôn 1989. (5) Faridah Hanum, tinggai di Banda Aceh. guru SMPN 1 Banda Aceh, tamat sarjana bak FKIP Unsyiah thôn 1987. (6) Badruddin, tinggai Krueng Raya, Aceh Besar, guru SMAN 1 Mesjid Raya Aceh Besar, tamat sarjana bak FKIP Unsyiah thôn 1988. (7) T. Husni.tinggai di Sigli. Pidie. guru SMPN 2 Sigli. tamat sarjana bak FKIP Unsyiah thôn 1993. Jinoe teungoh kuliah magiseute bak Program Studi Magister Pendidikan Bahasa, PPS Unsyiah, Banda Aceh. Keureuna teumpat tinggai kamoe jiôh-jiôh, kamoe meuduek pakat ngön keureuja sibuleuen sigo atawa sibuleuen dua go di Banda Aceh. Meujan-jan kamoe meuhimpôn bak hotè dua Ihèe uroe. Adak pih meunan, kamoe ka meuôseuha ubé ék. Nyang peunténg buku nyoe ka seuleuso dan ka na bakjaroegeutanyoe. Buku nyoe kamoe peurampông bak awai Maret 2008. Hai laén nyang kamoe teumeung seulama (seulawét – red) kamoe tuléh buku nyoe meunyangkôt dialek basa Aceh nyang mumacam bagoe. Basa Aceh na padum-padum boh dialek. Han mungkén mandum dialek nyan kamoe ngui lam buku nyoe. Kamoe seupakat, basa Aceh nyang kamoe ngui lagèe lam buku nyoe. Kamoe meuharap, pembaca beu geumaklum (geupeumeu’ah-red). Buku Peulajaran Basa Aceh nyoe kamoe tuleh ngön seumangat seureuta rasa cinta kamoe keu basa Aceh. Asoe di dalam jih kamoe ôsaha beu cocok ngön umu murip SMP/MTs. Rap mandum asoe buku meukeunong (meuhubông-kaét -red) ngön dônya ureueng Aceh. Kamoe yakin, buku nyoe na meunapeu’at keu guru basa Aceh, murip sikula,atawa masyarakat Aceh ban mandum. Kamoe meulakèe meu’ah meunyoena khilaf ngön cidra. Saleuem ngön tabék kamoe keu mandum syèdara nyang tém bri koreksi keu asoe buku nyoe menyoe (meunyo -red) mantöng na salah bacut sapat.

Banda Aceh, Juni 2008 Peungarang