Teunuleh basa Aceh ka saban-sare tateupue jameunkön meutuleh ngon teunuleh harah Jawoe (جاوي) hana meutuleh ngön harah laten.
Pajan phon that meutuléh ngön harah laten? Soe nyang hana buet jak tuka-taki teunuleh basa Aceh nyan?
Lam saboh riwayat nyang meuhubongkaet ngön basa Melayu, nyang phon that jak tuleh basa Melayu ngön harah laten nakeuh yoh masa thon 1603 atawa nibak 1012 thon lheuh hijrah Nabi Muhammad S. A. W.
Nibak masa nyan na sidroe awak Belanda geudrop le Laksamana Malahayati ‘oh lheuh meuprang ilaot. ‘Oh lheuh nyan geupuwoe u darat geupasoe lam glap di wilayah Pidie -Aceh uroe nyoe. Nan jih Frederick De Houtman, syedara jih Cornelius de Houtman ka keumah geupoh mate yoh watee meuprang lam laot.
Frederick de Houtman seulawet lam glap nyan galak that jiteumuleh, jipakat peugah haba mandum awak Aceh nyang na lam kawasan nyan. Meunan keuh kiban göt akai ureung Aceh uroe jeh ngön teumawan prang, jiteumee karang kamuih nyang phon that lama basa Melayu ngön Belanda nyang phon that, hana laen yoh golom nyan kamuih basa Melayu nyang meutuleh ngön harah laten.
Treb nibak nyan ‘oh ka lheuhjih lam glap kajiwoe keudeh u nanggroejih, meu ipeuteubiet teuk saboh keunarang nyang asoe jih na keuh conto kalimat nyang meutuleh lam basa Melayu ngön Belanda nibak thon 1603 nyan. Jipeunan Spraeck ende woord-boeck.
Spraeck ende woord-boeck, in de Maleysche ende Madagaskarsche talen, met vele Arabische ende Turcsche woorden – Frederick De Houtman Van Gouda
Pustaka Universiteit Utrecht
Lam teunuleh hinan jai that dum narit basa Melayu nyang meujampu-jampu ngön basa Aceh. Bah pih hana jipeugah nyan basa Aceh tapih geutanyoe jeut ta kalön keudroeteuh padum-padum boh narit nyang jituleh hinan lagee geutanyoe Aceh pham. Nyan keuh miseu awak nyang han jeut basa Aceh jak baca kakeuh hana meuho uram ujong laju, han meupat punca.
Ijaan Basa Aceh
Phon-phon that nyang tuleh buku lam basa Aceh na keuh P Arriens , sidroe awak Ulanda. Nyang asoe jih yakni hase jipeugah haba ngön ureueng Aceh. Jiboh nan MALEISCH, HOLLANDSCH, ATJEHSCHE WOORDENLIJST atawa lam basa geutanyoe nakeuh PEUGAH HABA BASA MELAYU, ULANDA, ACEH, nyang jipeuteubit nibak thon 1880 nyang asoe jih na keuh bhah conto keu peugah haba lam lhèe boh basa nyan. Kheun jih rab troh 4 thon jipeusapat mandum narit nyan, nyang jideungö nibak tuto-tuto ureueng nyang caröng-caröng di Aceh yoh masa nyan.
Kheun jih, seugohlom nyan na sit jipeuteubiet le Bataviasch Genootschap van Kunsten en Wetenschappen (Batavian Society of Arts and Sciences) basa Aceh nyang rab trok 200 boh narit. Laen nibak nyan hana laen, buku nyoe laju nyang leubeh jai lom ngön leungkap, nyang jeut jingui ju le teuntra jih nibak masa nyan.
(meusambong lom kali ukeu) —
Teuma dudoe meubaro na ureung Aceh nyang ngui harah laten nyan na keuh nibak thon 1920-an
Harah latén Basa Aceh
a i u e é è ô ö o
‘a ‘i ‘ö ‘u ‘o ‘e
Lam basa Aceh na harah
a, i, u
Seulaen nibak nyan
e, é, è
miseu meunoe :
ek (hei!)
ék (naik)
èk (tahi)
Na lom harah :
ô, ö, o
| Basa | O | Ô | Ö |
| Aceh | boh | bôh | böh |
| Melayu/Indonesia | buah | taruh | buang |
| .. | |||
| Aceh | lon | lôn | lön |
| Melayu/Indonesia | tanah lembab | saya | tanah lembab |
| .. | |||
| Aceh | gadoh | gadôh | gadöh |
| Melayu/Indonesia | hilang | sibuk | hilang |
| .. | |||
| Aceh | baro | barô | |
| Melayu/Indonesia | kemarin | baru | |
| .. | |||
| Aceh | pot | pôt | pöt |
| Melayu/Indonesia | pot bunga | kipas, bertiup, dibawa terbang | memetik |
| .. | |||
| Aceh | po | pô | pö |
| Melayu/Indonesia | terbang | punya | terbang |
| .. | |||
| Aceh | go | gö | |
| Melayu/Indonesia | gagang, kali | gagang, kali |
Na harah nyang ch’o bak takheun (su lam idong)
‘a , ‘i, ‘ö ,’u, ‘o , ‘e
miseu meunoe :
‘a -> meu ‘a-‘a ji klik (menangis keras)
‘i- > meu’i-‘i su (suara nyaring)
‘ö -> ‘ö hai ( iyaa lah.. /ya benar lah)
‘u -> meu ‘u-‘u angen (angin kencang bertiup)
‘o -> ma-‘op (monster/ makhluk aneh)
‘e -> pa-‘e (tokek)’eu -> ta’eun (wabah)
(Meusambong lom kali ukeu insya Allah)
- Geutuléh lé Iqbal Hafidh nibak thon 1441 bak 28 uroe buleuen Sapha, geujak beut bak Balé Drah Aceh Jawöe – جاوي اچيه i Darussalam